पुणे : ‘भविष्यात सोन्यातील गुंतवणुकीवर आजच्याइतके फायदे मिळणे शक्य नाही; मात्र शेअर्स आणि म्युच्युअल फंड गुंतवणुकीवरील फायदा वाढवणे शक्य आहे. जोखीम घेऊनदेखील फायदेशीर गुंतवणूक करणे म्युच्युअल फंडाद्वारे शक्य आहे. ३० वर्षांत आपण केलेल्या गुंतवणुकीच्या चार ते ४० पट वाढ होण्याची क्षमता म्युच्युअल फंडातील गुंतवणुकीत असते,’ असे प्रतिपादन म्युच्युअल फंड क्षेत्रातील तज्ज्ञ परमिंदर धिल्लन यांनी केले.
‘म्युच्युअल फंड आणि संपत्ती निर्मिती’ या विषयावर पुण्यात आयोजित करण्यात आलेल्या चर्चासत्रात ते बोलत होते. चर्चासत्राला चांगला प्रतिसाद मिळाला. सुरेशचंद्र सुरतवाला असोसिएट्स आणि चंद्रकांत डोंगरे असोसिएट्स यांच्या संयुक्त विद्यमाने निमंत्रितांसाठी हे चर्चासत्र आयोजित करण्यात आले होते. २० डिसेंबर रोजी सायंकाळी पाच ते आठ या वेळेत अश्वमेध हॉल (एरंडवणे) येथे हे चर्चासत्र झाले. ‘म्युच्युअल फंड’मधील गुंतवणुकीबद्दलचे समज-गैरसमज यांबाबत या वेळी मार्गदर्शन करण्यात आले. या वेळी माजी महापौर शांतिलाल सुरतवाला, साहित्यिक भारत सासणे यांच्यासह विविध क्षेत्रातील पुणेकर उपस्थित होते.
परमिंदर धिल्लन म्हणाले, ‘स्वस्त कंपन्यांतील गुंतवणूक फायदा देते असा समज आहे. पण, महाग शेअर्ससुद्धा मोठे फायदे देतात. फंड मॅनेजरला या सर्व गोष्टींचे ज्ञान असावे लागते. शेअर मार्केट सर्वांना समजत नाही; पण म्युच्युअल फंडामधील गुंतवणूक समजून घेता येण्यासारखी असते. मंदीकडे संधी म्हणून पाहिले पाहिजे. ‘एचडीएफसी’सारख्या गृहबांधणी क्षेत्रातील कंपनीत परकीय गुंतवणूक वाढत आहे.’
‘भारतात नकारात्मक घडामोडींची जास्त चर्चा होते. अवतीभवती अधोगतीचे वातावरण आहे असे वाटत राहते. बचत आणि बँकांतील ठेवींचे व्याजदर कमी होत चालले आहे. आपल्याला महागाई कमी करता येणे शक्य नाही. भविष्यात सोन्यातील गुंतवणुकीवर आजच्याइतके फायदे मिळणे शक्य नाही; मात्र शेअर्स आणि म्युच्युअल फंड गुंतवणुकीवरील फायदा वाढवणे शक्य आहे. इक्विटीमधील गुंतवणूक पब्लिक प्रॉव्हिडंड फंडापेक्षा अधिक लाभ देऊन जाते. फंड निवडताना पोर्टफोलिओतील वैविध्य जपले पाहिजे. एक दिवसापासूनच्या मुदतीची गुंतवणूक फंडात करू शकतो; पण पाच वर्षांपेक्षा अधिक काळासाठी गुंतवणूक फायदेशीर ठरू शकते. शेअर बाजार कोसळला, तरी तो पुन्हा करेक्शनद्वारे उभारी घेत असतो. त्यामुळे घाबरून जाता कामा नये,’ असे धिल्लन म्हणाले.
‘दरमहा किमान १० हजार रुपयांची गुंतवणूक म्युच्युअल फंडामध्ये करण्याची सवय लावून घेतली, तर भविष्यातील वाढीव खर्च, महागाई, घर, शिक्षण, पर्यटन, वैद्यकीय खर्चाची तोंडमिळवणी करणे शक्य आहे. ‘सिस्टमॅटिक इन्व्हेस्टमेंट प्लॅन’द्वारे गुंतवणूक करणे योग्य ठरू शकते,’ असे ते म्हणाले.
‘लाखाहून अधिक गुंतवणूक फंडात करणाऱ्यांना मुदतीचे विड्रॉवल प्लॅनही उपलब्ध असतात. एकूण मुदतीच्या आधी गरजेपोटी काही रक्कम काढत राहिली, तरी प्रत्यक्ष फायद्यातून उरणारी रक्कम नक्कीच घसघशीत असते,’ असे मत त्यांनी मांडले.
‘३० वर्षांत आपण केलेल्या गुंतवणुकीच्या चार ते ४० पट वाढ होण्याची क्षमता म्युच्युअल फंडातील गुंतवणुकीत असते. गुंतवणुकीस प्रारंभ करायला उशीर झालाय असे कधीही न समजता, सुरुवात करावी,’ असेही धिल्लन यांनी सांगितले.